पुणे : भूसंपादन प्रकरणातील निकालाची प्रत देण्यासाठी शेतकऱ्याकडे तब्बल एक लाख रुपयांची लाच मागितल्याचा धक्कादायक प्रकार उघडकीस आला आहे. उपजिल्हाधिकारी भूसंपादन कार्यालयात कंत्राटी पद्धतीने काम करणाऱ्या सेवानिवृत्त मंडल अधिकारी महिलेला लाचलुचपत प्रतिबंधक विभागाने (एसीबी) रंगेहाथ ताब्यात घेतले. या प्रकरणी बंडगार्डन पोलीस ठाण्यात भ्रष्टाचार प्रतिबंधक कायद्यानुसार गुन्हा दाखल करण्यात आला आहे.
सुनंदा अशोक वागसकर (येवले) असे ताब्यात घेण्यात आलेल्या महिलेचे नाव आहे. एका शेतकऱ्याने एसीबीकडे दिलेल्या तक्रारीनंतर ही कारवाई करण्यात आली. तक्रारदाराच्या ६२ वर्षांच्या मामे बहिणीच्या वडिलोपार्जित जमिनीच्या वाटपपत्र नोंदीसंबंधीचा दावा उपजिल्हाधिकारी भूसंपादन विभागाकडे दाखल होता. या प्रकरणाची सुनावणी पूर्ण होऊन निकाल झाला असून, त्या निकालाची प्रत देण्यासाठी वागसकर यांनी लाचेची मागणी केल्याचा आरोप आहे.
प्राथमिक टप्प्यात तक्रारदाराकडे ५० हजार रुपयांची मागणी करण्यात आली होती. मात्र, एसीबीने केलेल्या पडताळणीदरम्यान ही रक्कम वाढवून स्वतःसाठी तसेच उपजिल्हाधिकारी यांच्या नावावर एकूण एक लाख रुपयांची लाच मागितल्याचे निष्पन्न झाले. १४ नोव्हेंबर रोजीच्या पडताळणीत आरोपी महिलेने लाच मागणी करून ती स्वीकारण्याची तयारी दर्शविल्याचे स्पष्ट झाले.
त्यानुसार एसीबीच्या पथकाने सापळा रचून वागसकर यांना ताब्यात घेतले. त्यांच्या विरोधात बंडगार्डन पोलीस ठाण्यात भ्रष्टाचार प्रतिबंधक कायद्यांतर्गत गुन्हा दाखल करण्यात आला आहे.
ही कारवाई लाचलुचपत प्रतिबंधक विभागाचे पोलिस अधीक्षक शिरीष सरदेशपांडे आणि अतिरिक्त पोलिस अधीक्षक अजित पाटील यांच्या मार्गदर्शनाखाली करण्यात आली. सरकारी कार्यालयातील लाचखोरीविरोधात एसीबीने पुन्हा एकदा कठोर पवित्रा घेतल्याचे या कारवाईतून स्पष्ट झाले आहे.
