पुणे : भारतीय जनता पक्ष हा केवळ सत्तेसाठी नाही तर विचाराने आणि जनतेच्या सेवेसाठी काम करणारा पक्ष आहे. निवडणूक असो वा नसो, भाजपचा कार्यकर्ता वर्षभर २४ तास काम करत असतो. पुण्यात राष्ट्रवादी काँग्रेसची अवस्था बिकट झाली असून त्यांना निवडणुकीसाठी उमेदवारही मिळत नाहीत. त्यामुळे उमेदवार आयात करावे लागत आहेत. पुणे शहराला देशातील सर्वोत्तम शहर बनवायचे असेल तर पंतप्रधान नरेंद्र मोदी यांच्याशिवाय कोणताही पर्याय नाही, असे ठाम मत केंद्रीय सहकार राज्यमंत्री व पुणे शहराचे खासदार मुरलीधर मोहोळ यांनी व्यक्त केले.
पुणे महानगरपालिका सार्वत्रिक निवडणूक २०२६ साठी औंध–बोपोडी प्रभाग क्रमांक ८ मधून भारतीय जनता पक्ष व रिपब्लिकन पार्टी ऑफ इंडिया (आरपीआय) यांच्या वतीने सनी विनायक निम्हण, परशुराम वाडेकर, भक्ती अजित गायकवाड आणि सपना आनंद छाजेड हे चार उमेदवार निवडणूक रिंगणात उतरले आहेत. त्यांच्या प्रचाराचा शुभारंभ बोपोडीचे ग्रामदैवत भैरवनाथाचे दर्शन घेऊन करण्यात आला. यावेळी मुरलीधर मोहोळ बोलत होते.
कार्यक्रमास शिवाजीनगर मतदारसंघाचे आमदार सिद्धार्थ शिरोळे यांच्यासह भाजप व आरपीआयचे पदाधिकारी आणि कार्यकर्ते मोठ्या संख्येने उपस्थित होते.
मुरलीधर मोहोळ पुढे म्हणाले, मागील पाच वर्षांत पुणे महापालिकेत भाजपने केलेल्या कामातून शहराला विकासाच्या दिशेने नेण्याचा प्रामाणिक प्रयत्न केला आहे. आमदार सिद्धार्थ शिरोळे यांचे गेल्या सहा वर्षांतील काम, केंद्रातील मोदी सरकार आणि राज्यातील देवेंद्र फडणवीस सरकारच्या योजनांमुळे आज घरोघरी सरकारी योजनेचा लाभार्थी सापडतो. आम्हाला केवळ सत्ता नको, तर जनतेची निष्ठेने सेवा करायची आहे, असेही त्यांनी स्पष्ट केले.
यावेळी उमेदवार सनी निम्हण म्हणाले, स्वर्गीय मंत्री चंद्रकांत छाजेड साहेबांचा सर्वांना सोबत घेऊन जाण्याचा विचार आणि स्वर्गीय कार्यसम्राट आमदार विनायक निम्हण साहेबांची काम करण्याची धमक घेऊन आम्ही चौघेही उमेदवार या प्रभागाचा समतोल व सर्वांगीण विकास साधण्यासाठी कटिबद्ध आहोत.
अन्न, वस्त्र, निवारा यासोबतच शिक्षण आणि आरोग्य या मूलभूत गरजांवर आमचा भर राहील. बोपोडी परिसरात दर्जेदार आरोग्य सुविधा उपलब्ध करून देण्यात येतील. सध्या असलेल्या दोन महापालिकेच्या दवाखान्यांचे सक्षमीकरण करण्यात येईल तसेच ट्रॉमा केअर सेंटर सुरू करण्यात येईल. गुणवत्तापूर्ण शिक्षणासाठी ई-लर्निंग स्कूल सुरू करण्याचे आश्वासनही त्यांनी दिले. सर्व जाती-धर्मांना सोबत घेऊन विकास करण्यासाठी आम्ही जनतेसमोर जात आहोत, असे त्यांनी नमूद केले.
आमदार सिद्धार्थ शिरोळे म्हणाले, राज्यात आणि देशात आज ‘डबल इंजिन’ सरकार आहे. पुणे शहराच्या विकासाला गती द्यायची असेल तर महापालिकेतही भाजपला बहुमत द्या. ‘ट्रिपल इंजिन’ सरकार पुणे शहराला विकासाच्या सुपरफास्ट मार्गावर घेऊन जाईल, असा विश्वास त्यांनी व्यक्त केला.
