पुणे : अविष्कार फाउंडेशन, कोल्हापूर (महाराष्ट्र) यांच्या वतीने जागतिक शिक्षक दिनानिमित्त आयोजित राज्य व राष्ट्रीय पुरस्कार वितरण सोहळा 2025, ट्विन फाउंटन, गोवा येथे 30 नोव्हेंबर रोजी भव्यदिव्य स्वरूपात पार पडला. या सोहळ्यात ढोले पाटील ज्युनिअर कॉलेज ऑफ आर्ट्स, कॉमर्स अँड सायन्सचे प्राचार्य प्रा. विठ्ठल गायकवाड यांना ‘उत्कृष्ट प्राचार्य कार्यगौरव’ हा राष्ट्रीय पुरस्कार प्रदान करण्यात आला.
हा सन्मान अविष्कार फाउंडेशनचे राष्ट्रीय अध्यक्ष संजय पवार, एम. डी. देसाई (वायुदल), तसेच सामाजिक कार्यकर्ते आणि मान्यवर यांच्या हस्ते प्रदान करण्यात आला. शिक्षण क्षेत्रातील प्राचार्य गायकवाड यांच्या सातत्यपूर्ण, गुणवत्तापूर्ण आणि परिणामकारक कार्याची ही अधिकृत दखल मानली जात आहे.
प्रा. गायकवाड सलग २० वर्षे प्राचार्य पदावर कार्यरत असून शैक्षणिक व्यवस्थापन, विद्यार्थ्यांचा सर्वांगीण विकास आणि शिक्षक नेतृत्व यांसारख्या क्षेत्रात त्यांनी उल्लेखनीय कामगिरी बजावली आहे. यापूर्वीही त्यांना अनेक पुरस्कारांनी सन्मानित करण्यात आले असून, संत साहित्याचे अभ्यासक म्हणूनही त्यांची स्वतंत्र ओळख आहे. ‘संत तुकाराम महाराजांच्या अभंगातून व्यक्तिमत्त्व विकास’ या विषयावर त्यांचे पीएच.डी. संशोधन कार्य सुरू आहे. त्यांच्या लेखनाला सकाळसह विविध दैनिके व नामांकित मासिकांतून दाद मिळाली असून संशोधनपर लेखही प्रकाशित झाले आहेत.
मूळचे पुणे जिल्ह्यातील मलठणचे असलेल्या प्रा. गायकवाड यांच्या कार्याची शैक्षणिक व सामाजिक क्षेत्रातील मान्यवरांकडून प्रशंसापूर्वक दखल घेतली जात आहे. ढोले पाटील एज्युकेशन सोसायटीचे चेअरमन सागर ढोले पाटील यांनीही प्रा. गायकवाड यांच्या या यशाबद्दल मनःपूर्वक अभिनंदन करत संस्थेच्या कार्यात त्यांच्या नेतृत्वाने सातत्याने प्रेरणा दिल्याचे सांगितले.
