पुणे : छत्रपती शिवाजी महाराज यांच्या जयंतीनिमित्त पुणे महानगरपालिकाच्या औंध रोड कार्यालयाच्या वतीने परिसर स्वच्छता व पाहणीसाठी विशेष संयुक्त मोहीम राबविण्यात आली. या मोहिमेत सर्व विभागप्रमुख, वार्ड अधिकारी नायकर यांच्यासह आरोग्य, अतिक्रमण, विद्युत, उद्यान तसेच ड्रेनेज विभागाचे अधिकारी व कर्मचारी सहभागी झाले होते.
ही पाहणी डॉ. बाबासाहेब आंबेडकर चौक ते राजर्षी शाहू महाराज चौक या मार्गावर करण्यात आली.
पाहणीदरम्यान परिसरातील स्वच्छता, अतिक्रमणांची स्थिती, विद्युत व्यवस्था, हिरवळ तसेच ड्रेनेज व्यवस्थेचा सखोल आढावा घेण्यात आला. यावेळी उपमहापौर परशुराम वाडेकर, नगरसेवक सनी निम्हन, नगरसेविका सपना छाजेड, भक्ती गायकवाड तसेच आनंद छाजेड, अमित मुरकुटे, अविनाश कदम व अन्य स्थानिक कार्यकर्ते उपस्थित होते.
याप्रसंगी उपमहापौर परशुराम वाडेकर यांनी अशाच स्वरूपाची संयुक्त मोहीम दर दोन महिन्यांनी शहरातील सर्व प्रभागांतील झोपडपट्ट्या व प्रमुख रस्त्यांवर राबविण्याचे निर्देश दिले. सातत्यपूर्ण मोहिमेमुळे नागरिकांच्या दैनंदिन समस्या तातडीने मार्गी लागण्यास मदत होईल, असा विश्वास त्यांनी व्यक्त केला.