पुणे : सिद्धार्थ नगर, बावधन बुद्रुक येथे संविधान दिनाचे औचित्य साधत रविवारी ‘आदर संविधानाचा जागर’ कीर्तन सोहळ्याचे भव्य आयोजन करण्यात आले. विकास प्रतिष्ठान आणि सुजाता महिला मंडळ यांच्या संयुक्त विद्यमाने आयोजित या सोहळ्याला ग्रामस्थांसह विविध क्षेत्रांतील मान्यवरांनी मोठ्या संख्येने हजेरी लावली.
कार्यक्रमाची सुरुवात महापुरुषांच्या प्रतिमापूजनाने आणि भारतीय संविधानाच्या प्रतीचे पूजन करून करण्यात आली. त्यानंतर उपस्थितांनी सामूहिकरीत्या संविधानाच्या प्रास्ताविकेचे वाचन करीत लोकशाही मूल्यांप्रती निष्ठा व्यक्त केली. विकास प्रतिष्ठानचे संस्थापक तसेच रिपब्लिकन पक्ष, महाराष्ट्र प्रदेश युक्क आघाडीचे संघटक उमेश कांबळे यांनी स्वागतपर भाषणात संस्थेच्या सामाजिक उपक्रमांची दिशा मांडली. विद्यार्थ्यांना शैक्षणिक साहित्य वाटप, वृक्षारोपण मोहीम, तसेच जयंती-पुण्यतिथीनिमित्त आयोजित कार्यक्रमांना ग्रामस्थांचा मिळणारा उत्स्फूर्त प्रतिसाद त्यांनी विशेषत्वाने नमूद केला.
कार्यक्रमात शिक्षणसम्राट राजेंद्र बांदल, पोलीस पाटील बबनराव दगडे, माजी नगरसेवक दिलीप वेडे पाटील, रिपब्लिकन पक्षाचे परशुराम वाडेकर आणि पुणे मनपा सभागृह नेते बंडू केमसे यांसह अनेक मान्यवरांनी संविधानाच्या अस्मितेवर, जागर परंपरेवर आणि नागरिकांच्या कर्तव्यांवर मोलाची भाषणे केली.
सामाजिक बांधिलकीचा एक भाग म्हणून नामदेवराव मोरे माध्यमिक विद्यालय, बावधन येथील २०० विद्यार्थ्यांना शालेय साहित्य वाटप करण्यात आले. तसेच उपस्थित मान्यवरांचा शाल, संविधानाची प्रत आणि ‘संविधान ट्रॉफी’ देऊन सन्मान करण्यात आला. महाराष्ट्र शासन कीर्तन पुरस्कारप्राप्त राष्ट्रीय कीर्तनकार ह. भ. प. ज्ञानेश्वर महाराज वाबळे यांच्या प्रभावी संविधान कीर्तनाने कार्यक्रमाला विशेष उजाळा मिळाला.
सोहळ्यास बावधन परिसरातील अनेक सामाजिक कार्यकर्ते, ग्रामस्थ आणि युवा नेतृत्वाची मोठी उपस्थिती लाभली. कार्यक्रमाचे सूत्रसंचालन वैभव मुरकुटे, शीलाताई पठाण आणि दीपक मस्के यांनी उत्कृष्टपणे केले.
