पुणे : पुणे महापालिका निवडणुकीच्या पार्श्वभूमीवर शहरातील राजकारण तापू लागले असून, सत्ताधारी भाजपमध्ये प्रवेशाचा ओघ वाढताना दिसत आहे. अशातच वडगाव शेरी मतदारसंघातील प्रभावशाली नेते सुरेंद्र पठारे यांनी भारतीय जनता पक्षात अधिकृत प्रवेश केल्याने राजकीय वर्तुळात मोठी खळबळ उडाली आहे. त्यांच्या या प्रवेशामुळे मतदारसंघातील राजकीय समीकरणे बदलण्याची शक्यता व्यक्त केली जात आहे.
गेल्या काही दिवसांपासून विविध पक्षांतील पदाधिकारी, कार्यकर्ते भाजपमध्ये प्रवेश करत असून, पुण्यातील भाजपाची ताकद सातत्याने वाढत आहे. त्यातच आता स्थानिक पातळीवर मजबूत पकड असलेले सुरेंद्र पठारे भाजपात दाखल झाल्याने पक्षाला थेट आणि मोठा फायदा होणार असल्याचे चित्र आहे.
सुरेंद्र पठारे यांची ओळख संघटन कौशल्य, कार्यकर्त्यांचा मजबूत फळी आणि स्थानिक प्रश्नांवर ठाम भूमिका घेणारा नेता अशी आहे. सामाजिक व नागरी प्रश्नांवर त्यांनी अनेक वर्षे प्रभावी काम केले असून, त्यांचा मोठा जनाधार आहे. हा जनाधार आगामी निवडणुकांमध्ये भाजपाच्या पाठीशी उभा राहणार असल्याने, वडगाव शेरीत भाजपाची स्थिती अधिक भक्कम होणार असल्याचा अंदाज व्यक्त केला जात आहे.
विरोधकांना धक्का
पठारे यांच्या भाजप प्रवेशामुळे मतदारसंघातील मध्यमवर्गीय, युवक आणि स्थानिक कार्यकर्त्यांमध्ये भाजपाबाबत सकारात्मक वातावरण निर्माण झाले आहे. त्यांच्या नेतृत्वाखाली अनेक कार्यकर्ते भाजपात सहभागी होण्यास तयार असल्याची चर्चा आहे. त्यामुळे विरोधी पक्षांना हा मोठा धक्का मानला जात असून, आगामी महापालिका निवडणुकीत वडगाव शेरीत भाजपाची बाजू अधिक मजबूत झाल्याचे स्पष्ट संकेत मिळत आहेत.
