सुवर्णा कांचन मुख्य संपादक
पुणे : लोककल्याणकारी राज्यकारभार, न्यायप्रियता आणि समाजसेवेचा आदर्श ठरलेल्या महाराणी राजमाता अहिल्यादेवी होळकर यांच्या ३०१व्या जयंतीनिमित्त उरुळी कांचन येथे सकल धनगर समाजाच्या वतीने भव्य आणि उत्साहपूर्ण मिरवणुकीचे आयोजन करण्यात आले. पारंपरिक संस्कृतीचा साज, धनगरी ढोलांचा दणदणाट आणि आकर्षक सजावटीने नटलेला भव्य रथ हे मिरवणुकीचे प्रमुख आकर्षण ठरले.
गावातील प्रमुख मार्गांवरून निघालेल्या या मिरवणुकीत समाजबांधवांनी मोठ्या संख्येने सहभाग नोंदविला. महाराणी अहिल्यादेवी होळकर यांच्या प्रतिमेस पुष्पहार अर्पण करून अभिवादन करण्यात आले. “पुण्यश्लोक अहिल्यादेवी होळकरांचा विजय असो” अशा जयघोषांनी परिसर दुमदुमून गेला. पारंपरिक वेशभूषेत सहभागी झालेल्या युवक-युवतींनी मिरवणुकीला विशेष रंगत आणली.
धनगरी ढोलांच्या गजरात आणि लेझीमच्या तालावर निघालेल्या या मिरवणुकीने गावकऱ्यांचे लक्ष वेधून घेतले. आकर्षक फुलांची सजावट केलेल्या रथावर विराजमान असलेल्या अहिल्यादेवींच्या प्रतिमेने सर्वांचेच मन जिंकले. ठिकठिकाणी नागरिकांनी मिरवणुकीचे स्वागत करून पुष्पवृष्टी केली. सामाजिक एकात्मता, सांस्कृतिक परंपरा आणि इतिहासाबद्दलचा अभिमान यांचे सुंदर दर्शन या सोहळ्यात घडले.
या कार्यक्रमास विद्यमान सरपंच मिलिंद जगताप, माजी सरपंच दत्तात्रय शांताराम कांचन, सुभाष बगाडे, संजय टिळेकर, माजी सरपंच संतोष हरिभाऊ कांचन, अमित बाबा, सुभाष टिळेकर, काळूराम मेमाणे, सचिन ननावरे, अर्जुन कोकाटे, अजित जाधव, भगवान जाधव, दिलीप शंकर गाडेकर, आप्पा वाघमोडे, सागर आगलावे, राहुल आगलावे, बळीराम दुबे, बाळासाहेब मदने, बाबासाहेब गायकवाड, बाबासाहेब नायकवडे, प्रमोद मार्कड, उद्योजक सचिन मार्कड, सोमनाथ मदने कोळपे, मारुती कोकाटे, सिद्धेश्वर यमगर, बापू करे, अतीश मदने, अनिल वगरे यांच्यासह विविध क्षेत्रांतील मान्यवर उपस्थित होते.
यावेळी उपस्थितांनी महाराणी अहिल्यादेवी होळकर यांच्या कार्याचा गौरव करताना त्यांच्या आदर्शांवर चालण्याचा संकल्प व्यक्त केला. समाजहित, धर्मसंवर्धन, महिला सक्षमीकरण आणि लोककल्याणकारी प्रशासनाचा वारसा जपणाऱ्या अहिल्यादेवींच्या स्मृतींना अभिवादन करत त्यांच्या विचारांचा जागर करण्याचे आवाहन करण्यात आले.
उरुळी कांचनमध्ये पार पडलेल्या या दिमाखदार सोहळ्याने इतिहासाविषयीचा अभिमान, सामाजिक ऐक्य आणि सांस्कृतिक परंपरेचे जतन यांचा संदेश देत जयंती उत्सव संस्मरणीय ठरविला. सकल धनगर समाजाच्या एकजुटीचे आणि संघटनशक्तीचे दर्शन घडविणारा हा सोहळा नागरिकांच्या चर्चेचा विषय ठरला.
बापुराव चौधरी उपसंपादक