सुवर्णा कांचन मुख्य संपादक
पुणे : मुंबई येथे ३ ते ५ जून २०२६ दरम्यान होणाऱ्या ‘वर्ल्ड ऑफ कॉंक्रिट इंडिया’च्या १२व्या आवृत्तीच्या पार्श्वभूमीवर इन्फॉर्मा मार्केट्सतर्फे पुण्यात विशेष गोलमेज परिषदेचे आयोजन करण्यात आले. पुणे आणि पश्चिम भारतातील वेगाने वाढणाऱ्या पायाभूत सुविधा, नव्या बांधकाम साहित्यांचा वापर आणि शाश्वत बांधकाम पद्धतींची गरज यावर या परिषदेत सखोल चर्चा झाली.
या चर्चासत्रात बिल्डर्स असोसिएशन ऑफ इंडिया (बीएआय), पुणेचे राज्य सचिव मनोज देशमुख, आर्किटेक्ट्स इंजिनियर्स अँड सर्व्हेअर्स असोसिएशनचे अध्यक्ष महेश बांगड, इंडस्ट्रियल फ्लोअरिंग असोसिएशनचे अध्यक्ष तथा अॅव्हकॉन टेक्निक्सचे व्यवस्थापकीय संचालक अजय सिंगम, १लॅटिसचे वरिष्ठ संचालक सुयोग केळुस्कर, सिका इंडियाचे संचालक जसवंत शोभना, बी. जी. शिर्के कन्स्ट्रक्शन टेक्नॉलॉजीचे महाव्यवस्थापक आप्पासाहेब भोसले आणि इन्फॉर्मा मार्केट्स इन इंडियाचे वरिष्ठ गट संचालक रजनीश खट्टर सहभागी झाले होते.
परिषदेत बाजारपेठेतील संधी, शाश्वत कार्यपद्धती आणि नावीन्यपूर्ण तंत्रज्ञानाच्या वाढत्या भूमिकेवर विविध मान्यवरांनी आपले विचार मांडले. कॉंक्रिट क्षेत्रातील भारतातील एकमेव सर्वसमावेशक प्रदर्शन मानल्या जाणाऱ्या या प्रदर्शनात यंदा ३५० हून अधिक देशांतर्गत व आंतरराष्ट्रीय ब्रँड्स तसेच १८ हजारांहून अधिक व्यावसायिक सहभागी होण्याची अपेक्षा व्यक्त करण्यात आली.
बांधकाम क्षेत्रासमोरील आव्हानांवर भाष्य करताना मनोज देशमुख म्हणाले, ‘‘भारतातील बांधकाम उद्योगासमोर तंत्रज्ञानाचा अवलंब, वाढता खर्च, कौशल्यातील तफावत आणि देयकातील विलंब अशी अनेक आव्हाने आहेत. क्षेत्र आजही मोठ्या प्रमाणावर मानवी श्रमांवर अवलंबून असल्याने कौशल्य विकास, अभियंत्यांना वैधानिक मान्यता आणि उद्योग-सरकार यांच्यात अधिक प्रभावी संवाद आवश्यक आहे.’’
भारतातील बांधकाम क्षेत्रातील वाढीविषयी बोलताना सुयोग केळुस्कर म्हणाले, ‘‘आर्थिक वर्ष २०२६मध्ये देशातील सिमेंट उत्पादन सुमारे ४९० दशलक्ष टनांपर्यंत पोहोचण्याची शक्यता आहे. केंद्र सरकारच्या ₹१२.२ लाख कोटींच्या भांडवली खर्चामुळे महामार्ग, रेल्वे आणि प्रादेशिक पायाभूत सुविधांच्या विकासाला गती मिळत आहे.
प्रधानमंत्री आवास योजना अर्बन २.० आणि शहर आर्थिक क्षेत्रांसारख्या उपक्रमांमुळे टियर-२ व टियर-३ शहरांमध्येही विकास वेगाने होत आहे.’’
इन्फॉर्मा मार्केट्स इन इंडियाचे वरिष्ठ गट संचालक रजनीश खट्टर म्हणाले, ‘‘वर्ल्ड ऑफ कॉंक्रिट इंडिया एक्स्पो २०२६ हे उद्योग नेतृत्व, नावीन्य आणि कृतीयोग्य अंतर्दृष्टी यांना एकत्र आणणारे प्रभावी व्यासपीठ आहे. या माध्यमातून उद्योगाला प्रगत तंत्रज्ञानाचा अवलंब करून अधिक कार्यक्षम आणि शाश्वत बांधकाम पद्धती स्वीकारण्यास मदत होईल.’’
भारतातील एकमेव समर्पित कॉंक्रिट-केंद्रित प्रदर्शन म्हणून ‘वर्ल्ड ऑफ कॉंक्रिट इंडिया’मध्ये कच्चा माल, प्रीकास्ट तंत्रज्ञान, बांधकाम उपकरणे, रसायने आणि डिजिटल सोल्यूशन्स अशा संपूर्ण मूल्यसाखळीतील घटक एकत्र येणार आहेत. बिल्डर्स असोसिएशन ऑफ इंडिया तसेच अल्ट्राटेक आणि जेएसडब्ल्यू सिमेंटसारख्या उद्योग क्षेत्रातील अग्रगण्य कंपन्यांच्या सहभागामुळे हा कार्यक्रम बांधकाम क्षेत्रासाठी महत्त्वपूर्ण ठरणार असल्याचे आयोजकांनी सांगितले.
बापुराव चौधरी उपसंपादक