सुवर्णा कांचन मुख्य संपादक
पुणे : ग्रामीण भागातील नागरिकांना दर्जेदार नेत्रसेवा उपलब्ध करून देण्याच्या उद्देशाने उरुळी कांचन येथील बन्सीलाल पन्नालाल बलदोटा फाउंडेशन आणि पुण्यातील सुप्रसिद्ध बुधराणी हॉस्पिटल यांच्या संयुक्त विद्यमाने आयोजित करण्यात आलेल्या मोफत मोतीबिंदू निदान व नेत्रतपासणी शिबिराला नागरिकांचा उत्स्फूर्त प्रतिसाद लाभला. दर महिन्याच्या ६ तारखेला आयोजित करण्यात येणाऱ्या या उपक्रमांतर्गत ६ जून २०२६ रोजी श्रीराम मंदिर, गुळ आळी, सराफ गल्ली, उरुळी कांचन येथे शिबिराचे आयोजन करण्यात आले होते.
सकाळी १० ते दुपारी २ या वेळेत पार पडलेल्या या शिबिरामध्ये एकूण ८१ रुग्णांची नेत्रतपासणी करण्यात आली. तपासणीनंतर १५ रुग्णांची मोतीबिंदू शस्त्रक्रियेसाठी निवड करण्यात आली असून २५ रुग्णांना चष्म्यांचे वाटप करण्यात आले. तज्ज्ञ डॉक्टरांच्या मार्गदर्शनाखाली रुग्णांची सखोल तपासणी करून त्यांना आवश्यक उपचार व सल्ला देण्यात आला.
मोतीबिंदूच्या रुग्णांसाठी अत्याधुनिक फेको पद्धतीने शस्त्रक्रिया सवलतीच्या दरात उपलब्ध करून देण्यात येणार आहे. या शस्त्रक्रियेसाठी केवळ ५८०० रुपये शुल्क आकारण्यात येणार असून त्यामध्ये ७०० रुपये जेवण व प्रवास खर्चाचा समावेश आहे. याशिवाय बिनटाक्याची मोतीबिंदू शस्त्रक्रिया पूर्णतः मोफत करण्यात येणार असून त्यासाठी केवळ ७०० रुपये जेवण व प्रवास खर्च आकारला जाणार आहे.
शिबिरामध्ये आर्थिकदृष्ट्या दुर्बल व गरजू रुग्णांची विशेष काळजी घेण्यात आली. दृष्टीदोष असलेल्या रुग्णांना उच्च दर्जाचे चष्मे केवळ १२० रुपयांमध्ये उपलब्ध करून देण्यात आले. त्यामुळे अनेक रुग्णांना कमी खर्चात आवश्यक नेत्रसेवा मिळण्यास मदत झाली.
ग्रामीण भागात वेळेवर नेत्ररोगांचे निदान न झाल्यामुळे अनेकांना दृष्टीदोष आणि अंधत्वाचा सामना करावा लागतो. ही बाब लक्षात घेऊन बन्सीलाल पन्नालाल बलदोटा फाउंडेशनच्या माध्यमातून हा उपक्रम सातत्याने राबविला जात आहे.
नागरिकांनी नियमित नेत्रतपासणी करून घ्यावी, मोतीबिंदूसारख्या आजारांवर वेळेत उपचार घ्यावेत आणि दृष्टी सुरक्षित ठेवावी, असे आवाहन आयोजकांनी केले आहे.
दर महिन्याच्या ६ तारखेला आयोजित करण्यात येणाऱ्या या शिबिराचा लाभ परिसरातील नागरिक मोठ्या प्रमाणात घेत असून या उपक्रमामुळे ग्रामीण भागात आरोग्याविषयी जनजागृती होण्यासही मदत होत आहे. अधिकाधिक नागरिकांनी या सेवांचा लाभ घ्यावा, असे आवाहन आयोजकांच्या वतीने करण्यात आले आहे.
अधिक माहितीसाठी ८३९०६७५८०० किंवा ८५५७९८५५८० या क्रमांकांवर संपर्क साधावा.
बापुराव चौधरी उपसंपादक