सुवर्णा कांचन मुख्य संपादक
पुणे : नव्या स्वप्नांची, नव्या आशांची आणि नव्या उमेदांची चाहूल घेऊन शैक्षणिक वर्षाच्या पहिल्याच दिवशी जिल्हा परिषद प्राथमिक शाळा, सोरतापवाडी परिसर विद्यार्थ्यांच्या किलबिलाटाने आणि उत्साहाने दुमदुमून गेला. शाळेच्या प्रवेशद्वारापासून ते वर्गखोल्यांपर्यंत आकर्षक रांगोळ्या, रंगीबेरंगी स्वागत फलक आणि आनंददायी वातावरणाने विद्यार्थ्यांचे मनापासून स्वागत करण्यात आले.
सुट्टीनंतर मित्रमैत्रिणींना भेटण्याचा आनंद आणि नव्या पुस्तक-वह्यांचा सुगंध यामुळे विद्यार्थ्यांच्या चेहऱ्यावर विलक्षण आनंद झळकत होता. शाळेची एकूण पटसंख्या २१३ विद्यार्थी असून, प्रत्येक विद्यार्थ्याच्या शैक्षणिक गरजांचा विचार करून दरवर्षीप्रमाणे यंदाही हवेली पंचायत समिती सदस्य सुदर्शन चौधरी यांच्या पुढाकारातून विद्यार्थ्यांना मोफत शालेय साहित्याचे वितरण करण्यात आले. या उपक्रमाअंतर्गत तब्बल १०६५ दोनशे पानी वह्यांचे वाटप करण्यात आले. त्याचबरोबर प्रत्येक विद्यार्थ्यास पेन्सिल, पेन, खोडरबर आणि टोकयंत्र देऊन त्यांच्या शिक्षण प्रवासाला प्रोत्साहन देण्यात आले.
शालेय साहित्याचे वाटप होताच विद्यार्थ्यांच्या चेहऱ्यावर उमटलेला आनंद आणि समाधान पाहून उपस्थितांचे मन भारावून गेले. शिक्षणाची गोडी वाढावी, विद्यार्थ्यांना आवश्यक साहित्य सहज उपलब्ध व्हावे आणि त्यांच्या शिक्षणातील अडथळे दूर व्हावेत, या उदात्त हेतूने हा उपक्रम राबविण्यात आला असल्याची भावना सदस्य सुदर्शन चौधरी यांनी यावेळी व्यक्त केली.
कार्यक्रमादरम्यान पालकांनीही उत्स्फूर्त प्रतिसाद देत शाळेच्या उपक्रमांचे कौतुक केले. शिक्षकांनी केलेले सुयोग्य नियोजन, विद्यार्थ्यांचे शिस्तबद्ध सहभाग आणि पालकांचे सहकार्य यामुळे संपूर्ण कार्यक्रम उत्साहपूर्ण वातावरणात यशस्वीरीत्या पार पडला. नवीन शैक्षणिक वर्षाची सुरुवात आनंददायी आणि सकारात्मक वातावरणात होत असल्याने विद्यार्थ्यांच्या सर्वांगीण विकासासाठी प्रेरणादायी वातावरण निर्माण झाल्याचे चित्र पाहायला मिळाले.
यावेळी बोलताना पंचायत समिती सदस्य सुदर्शन चौधरी म्हणाले, “विद्यार्थी हेच देशाचे भावी शिल्पकार आहेत. त्यांच्या शिक्षणासाठी आवश्यक असलेले साहित्य उपलब्ध करून देणे ही आपली सामाजिक जबाबदारी आहे. शिक्षणाबरोबरच विद्यार्थ्यांच्या सर्वांगीण विकासासाठी शाळा सातत्याने प्रयत्नशील असून, नवीन शैक्षणिक वर्षाची सुरुवात उत्साहात आणि सकारात्मक वातावरणात होत असल्याचा आनंद आहे.”
या प्रसंगी विजय चौधरी, सनी चौधरी, रविंद्र गायकवाड, सोना कड, वैभव चौधरी, राहुल चोरगे, बाबासाहेब चौधरी, सुहास चौधरी, सुनील चौधरी, मेघराज चौधरी, अक्षय पिसाळ, शीतल चौधरी, योगेश ढगे आणि प्रवीण सणस आदी मान्यवर उपस्थित होते. उपस्थित मान्यवरांनी विद्यार्थ्यांना नवीन शैक्षणिक वर्षासाठी शुभेच्छा देत परिश्रम, शिस्त आणि जिद्दीच्या बळावर उज्ज्वल भविष्य घडविण्याचे मार्गदर्शन केले.
विद्यार्थ्यांच्या निरागस हास्याने आणि आनंदी चेहऱ्यांनी उजळलेला हा पहिला शालेय दिवस केवळ स्वागताचा कार्यक्रम न राहता, शिक्षणाच्या नव्या पर्वाची प्रेरणादायी सुरुवात ठरला.
बापुराव चौधरी उपसंपादक